والله ترى الدنيا ماتسوى‏

وصلني موضووع ع الايميل واتمنى تشوووفوون الناس شو يرسلووون

والله الدنيا ترى ماتسوى.... والرب واحد والعمر واحد....

ياجماعة نبي نفتح الإيميل عشان نستانس، مو عشان تلوع كبدنا ....

ياجماعة نبي نضحك، نبي نحب الحياة، نبي نتعلم شي جديد مفيد ما عشان الغلقة وضيقة الخلق... كفاية الدنيا فيها أحزان ومصايب.. حتى الإيميل ما خليتوه في حاله؟؟

يجيك إيميل أول الصبح :
احــــذر!!
عصير البرتقال ماركة الديك يسوي سرطان

وإلا كورن فلكس النمر يسبب داء الجنون

والبلاليط مصنوع من أمعاء القطط

**********

ويجيك إيميل من ناس فاضيين:
قائمة بالمواد الغذائية اللي فيها مادة ABCD XWZ 007 واللي تقطع النسل وتذبح جميع البشر وتسبب التسونامي

واللي أفضى منهم:
الدونت والبطاطس المقلية مخطط شنيع لنشر الصهيونية بواسطة دهن الخنزير

***********

والمصدقين روحهم:
أمريكا تغزو ديار المسلمين بواسطة شيبس ليز وسنكرز، وقد وجب الجهاد

**********

واللي عادين ومسويين نفسهم أطباء:

شرب الماء البارد بعد المكبوس يسبب سرطان القولون، وإلا سرطان الجهاز الهضمي

شرب اللبن قبل الدجاج المشوي التندوري (وليس الدجاج المطبوخ) يسبب قرحة في المعدة إلى الأبد وماتروح

أكل السلطة في صحن مسطح من غير ليمون يسبب ديسك في الظهر والرقبة واليد اليسرى

ومع ليمون يسبب التهاب المفاصل والركب والإصبع الصغير

عدم أكل وجبة الإفطار الساعة 6 يسبب انسداد في الأوردة بالإسمنت

خبز الخباز يسبب أمراض الكبد وإنفلونزا الدجاج

واللي عادين روحهم أصحاب نصيحة:

لا تآكلون سويت - لاتآكلون برجر

لا تآكلون آيس كريم - لا تآكلون سمارتيز

لا تآكلون خبز وجبن

لا لا لا لا لا لا لا لا لا لا ......

شدعوة...؟؟؟

عيل إيش بنأكل ؟؟

كل ما طلع شي جديد ذبحتونا عليه...

شيليز وكرسبي كريم وماكدونالد وستاربكس وبيبسي هدوا العالم كله وقرروا يخلون المسلمين يأكلون خنزير....

ترى سرطرتونا

كل شي مسرطن؟؟؟

يالله...

كل شي زين وحلو وناجح قالوا فيه دهن خنزير وجزء من المؤامرة الصهيونية الكبرى..؟؟

سلامات...

ترى فلسطين راحت بدون دونت كرسبي كريم

وأفغانستان يقصفونها كل يوم بقنابل متقدمة مو ببطاطس مكدونالد

تركوا عنكم الخرابيط.... وتركوا عنكم حكي الإشاعات...

يجيك إيميل :
الموبايل يسبب التفوئيد

والصابون سرطان مباشر ما في كلام

وشامبو جونسون للأطفال اللي كلنا من عمرنا سنه ويسبحونا فيه واحنا يهال يسبب السرطان ويقضي على الأجيال

واللابتوب يسبب الحصبة

والواير مال تلفزيون الصالة فيه ذبذبات خطيرة تسبب جنون البقر لعيال الفريج

ياحبيبي على وحش التكنولوجيا اللي بيهجم علينا .. لو ما قرينا الإيميلات كان رحنا ضحية الكارثة الإلكترونية البغيضة والوايرات المشربكة

كل مافتحنا الإيميل:
إحذروا.... الامر خطير.... لا يجب السكوت عنه....

حصل في البحرين: سيدة خذت كارد فيه مادة مخدرة وصادتها دوخة وباقوا فلوسها

هام جداً جداً جداً جداً جداً جداً جداً

حصل في مجمع الدانة واكتشفت الشرطة عصابة تنقل الإيدز

ونفس الإيميل نسخة (ماتعبوا روحهم يغيرون التفاصيل) عن مجمع "الغرير" في الإمارات..

والله شلخ... وشلخ بايخ بعد

شالخرابيط؟؟؟ تقصون على الناس؟؟ تطلعون إشاعات وترجونها ليش؟؟؟

وكله كوم... وإيميلات الحلال والحرام ومابينهما كوم ثاني

فتاوى الإيميل الحديثة، هذا حرام، وذاك حرااااام مضاعف، وجهنم الحمرا تنطركم كلكم، والموت وعزرائيل يحسبون لكم الدقايق...

ياجماعة ترى رب العالمين شديد العقاب صح

بس بعد غفور رحيم، وسعت رحمته كل شئ والحي أبقى من الميت..

والرسول عليه الصلاة والسلام قدّم الفرح على الحزن...

وقال تعالى : "ولا تكن فظاً غليظاً"

هاذي غير وصايا وتحف الاستهبال:

الشيخ فلان مكشوف عنه الحجاب شاف منام اللهم صل عالنبي

وكلكم لازم تقرون الإيميل وتطرشونه حال 10 أشخاص وإلا بينهار سد مأرب... عاد كيف ؟؟؟

بسكم عاد من سوالف الترهيب والفتاوى اللي تلف الانترنت كل يوم...

وما يبط كبدي الا بو يكتب في أخر الأيميل: "ارسلها"... عشان خاطر حبايب خالة جيرانكم ترسلها... ارسلها ترى بتندم... ارسلها أمانة عليك يوم القيامة.... استحلفك أن ترسلها..

رح زين وانت من عشان تحملني أمانة وتستحلفني مرة وحدة يا أخي؟؟؟

داش إيميل وإلا داش حرب؟؟؟

وعيال عمهم: جماعة "انشر".. أهو إعلان ؟؟ ولا تسويق إجباري؟؟

ما قاصر الا يقولون لك: "انشر احسن لك" أو "احترم نفسك وانشر"

والا اللي ايقول لك: إذا تبي لا ترسلها... بس الأجر بيروح عليك...

يعني الأجر ألحين كله صار في هالإيميل...؟ يعني انصك باب الحسنات ؟؟؟

مو على كيفكم من يرسل ومن ما يرسل وشنو يرسل...

والمتفلسف يقول لك: لا تخلي الشيطان يقص عليك وما ترسلها

احذر أن يوسوس لك إبليس أن لا ترسلها

حلفوا عاد؟؟؟

الشيطان قاص عليكم وماكل بعقلكم حلاوة وانتوا بس تارسين لنا الـinbox بإيميلات متشابهة كل يوم نفسها توصلنا

وعباقرة الرياضيات: طرشها مرة تكسب 456739832469 حسنة

طرشها مرتين تكسب 849656504594547664444748700000

حسنة..

"؟؟؟؟؟؟؟؟؟؟؟؟"

بس ملينا.. حتى الدين ما رحمتوه؟؟

ياجماعة.. "الكلمة طيبة صدقة"

والدين يسر...

الإيميل وسيلة تبادل معلومات خفيفة واستفادة... ما مركز خدمات أمراض الموت... ولا مركز التحذيرات من عصابات البش والدبش، ولا أداة للتنفير من الدين ونشر فتاوى شيوخ سبيس تون

وإذا الإيميل له قيمة وفيه فايدة الكل بينشره بدون صيغة الأمر البايخه.. وما محتاج طريقة أرجوك أحب خشمك لازم ترسلها

والناس أدرى باللي ينفعهم، ما يحتاجوا أحد يقول لهم إيش يسوو

خلوا الإيميل جزء حلو من اليوم، يرسم ابتسامة، ويضيف معلومة .. أو دعاء نستفيد منه

مع تحيات: واحد طق كبده من إيميلات تحتوي على كل ما ذكر أعلاه

أشكركـ عالموضوع وهذا الواقع...
وأنا بصراحه ما اقتنع ب هالأشياء..

هيه والله كلنا مانقتنع لكن شو نسوي طفروووبنا
مشكووور اخوي بو شهااب ع المروووور

» تخيلوا الدنيا من دون بنات !!~~
» كاريكاتير فنانيين << حبتيين والله خخخخخخخ
» ¯`·.·• (خذ من الدنيا عبرة , ومن الأمس خبرة) •°`·.·•
» سوني اركسون الجديد الحقو شوفو شكله والله اوكييييي ما شاء الله